كده فضت ...قصيدة عامية للبدري صابر شاعر الجنوب
سنين مرت ومرت من وراها سنين
ومستني حبيبي يعود وقلبي حزين
تعدي سنين وانا صابر ومستني
اشوف لو طيفه قدامي في سهدي
عشت مستني
سنيني في حبه سرقتني
وحتي الفرحه نسيتني
وصابر لاجل ليا عود
اتاري في حلمي ده عمري سنينه عماله تتسرسب
ويوم وري يوم وشهر وعام كبرت قوام
وشبت ولسه مستني حبيبي يعود
كبرت خلاص وجف العود وبرضه لسه مستني
يفيدك ايه ياقلبي خلاص
هيرجع ولا مش هيعود
زمان سابك وعشت العمر مستنيه
كبرت خلاص ولو يوم عاد
رجوعه ليك ده هيفيد ايه
هترجع تاني تبقي شباب
وهتعود تاني ايامك
ويرجع عودك المفتول
جبال تتهد قدامك
خلاص صدقني كده فضت
وخلصت هي م الاخر
وضاع عمرك يا قلبي بلاش
في حب قديم ميستاهل